Propoñemos que se inclúa a ampliación de Monticaño nos orzamentos de 2021

Propoñeremos que os orzamentos para o próximo ano sexan os que inclúan a ampliación de Monticaño. “A zona onde estaba o antigo vertedoiro tense que converter nunha grande área de ocio anexa a actual. Unha actuación pola que levamos anos esperando e é hora de darlle un pulo a esta iniciativa”, afirma Simón López, voceiro do grupo municipal socialista.

Nesta liña, instamos ao Goberno local a que “urxa e insista a quen teña que facelo” para que o esqueleto da residencia de maiores de Monticaño sexa derrubada. “Despois poderemos planear rutas de sendeirismo ou de bicis de montaña en colaboración con entidades deportivas de Arteixo como o club Jarnachas”, defende López.

Esta é unha das nosas propostas que presentaremos para as contas do próximo ano. “Comezamos a facer as nosas propostas porque aínda non sabemos nada dos presupostos”, subliña López.

Respecto ao mantemento do parque, reclamamos que se mellore e se “poña en valor a zona porque está moi descoidada”. É necesario que o Goberno local se poña a traballar e dea unha solución a este espazo”, conclúe López.