Os socialistas de Arteixo reclaman ao goberno local que asuma a construción dunha nova residencia de maiores ante a inacción do goberno galego

O Partido Popular  ven de rexeitar no Parlamento de Galicia a emenda do PSdeG-PSOE aos  orzamentos da Xunta sobre a construción da segunda residencia de maiores en Arteixo aprobada por unanimidade da corporación local no pleno anterior.

O grupo municipal socialista de Arteixo demanda saber se o goberno local pensa tomar a iniciativa dende o concello ante a negativa da Xunta de Galicia de orzamentar o proxecto dunha nova residencia de maiores en Arteixo.

O portavoz socialista, Martín Seco, explica que o concello de Arteixo estivo esperando moitos anos pola construción dunha residencia de maiores “e tivemos que esperar á inversión altruísta da Fundación Amancio Ortega para que fose esta entidade a que financiase a construción deste inmoble tan necesario para o noso concello”, nunha xestión na que o concello de Arteixo puxo a disposición unha parcela para a súa construción “e a Xunta de Galicia unicamente recolleu a residencia para a súa xestión”.

Os socialistas argumentan que dende a apertura desa residencia “as prazas ofertadas foron insuficientes para a demanda existente en Arteixo” e que son numerosos os veciños e veciñas “que nos transmiten a súa preocupación por non ter a capacidade de acceder a unha praza para os seus maiores”, xa que existe unha importante lista de espera que provoca que moitos maiores teñan que ir a poboacións lonxanas ou afrontar uns gastos inasumibles en residencias privadas.  

Seco expón que no pleno pasado o grupo socialista presentaba unha moción pedíndolle á Xunta de Galicia a construción dunha nova residencia de maiores no concello, “unha reivindicación que fixo que un grupo de veciñas e veciños recollese miles de sinaturas pedíndolle a administración autonómica que tivera en conta esa necesidade”.

A moción socialista solicitaba que se aceptasen as emendas do PSdeG-PSOE aos orzamentos da Xunta de Galicia, na que figuraba a construción da residencia e tivo o respaldo da unanimidade da corporación local, pero foi rexeitada polo Partido Popular no Parlamento de Galicia. “Unha negativa que fará imposible que se redacte ese proxecto no ano 2025”, afirma Seco.

“Sabemos doutras administracións locais que ante a inacción do goberno galego e asumindo unha competencia que é autonómica, iniciaron a construción desas infraestruturas” sinala o portavoz socialista que suliña que “Arteixo ten a sorte de dispoñer dunha forte capacidade de inversión cun elevado orzamento que debera de ser utilizado prioritariamente para dar mellor calidade de vida á nosa veciñanza”. 

O grupo socialista considera que na oferta de servizos do concello debera de ser prioritario o benestar dos maiores polo que entenden que ante a negativa da administración autonómica de levar a cabo este proxecto en 2025, o goberno local debera iniciar os trámites para facela realidade cos seus propios medios.