O PSOE de Arteixo solicita ao goberno local que regule o uso e funcionamento dos centros sociais
Martín Seco: “É necesario un catálogo de dereitos e obrigacións dos usuarios dos Centros Sociais, consensuado cos todos os grupos municipales da Corporación, para avanzar na descentralización administrativa e na articulación dos recursos municipais que favorezan a participación cidadá”
Centro social de Froxel
O grupo muncipal socialista de Arteixo presentará unha moción no vindeiro pleno para instar ao goberno local a redactar unha nova ordenanza ou regulamento de uso e funcionamento dos centros cívicos e sociais do concello, negociada con todos os grupos municipais da corporación.
O portavoz socialista Martín Seco explica que o Concello de Arteixo vén realizando un continuo esforzo para achegar a administración municipal á cidadanía, a través dun proceso descentralizador, “no que xogan un papel fundamental a instalación de Centros Sociais en todo o noso territorio”.
Seco argumenta que “os Centros Sociais non son só un mero equipamento de prestación de servizos administrativos”, senón que constitúen tamén “un lugar de encontro da comunidade veciñal, a través dos seus grupos e colectivos, para a promoción cultural e social”.
Por ese motivo, os socialistas consideran necesario que se profunde na regulación do uso cidadán dos espazos dos Centros Sociais "cun catálogo de dereitos e obrigacións dos usuarios” así como ”avanzar na descentralización administrativa e na articulación dos recursos municipais que favorezan a participación cidadá” como un medio eficaz de lograr unha mellor calidade de vida no concello de Arteixo.
Según Seco, “a construción e aluguer de novos espazos como centros sociais nestes 13 anos de goberno do PP non veu acompañada dun novo regulamento ou ordenanza que canalice o uso destes espazos públicos” no que se especifique como se realiza a súa apertura, quen ten dereito ao uso destes espazos, se teñen dereito as asociacións veciñais, sociais ou culturais a instalarse no seu interior e a ter chaves das súas instalacións, ou se poden ter servizos de hostalaría e en que condicións se poden desenvolver.
“Estas son moitas preguntas que deberían de ser contestadas nun regulamento novo ou ordenanza que dea seguridade e igualdade de oportunidades a todos os habitantes e asociacións do noso concello” sinala o voceiro socialista, polo que solicitan unha regulación actualizada para o funcionamento e uso de ditas infraestruturas públicas.
