Os socialistas de Arteixo denuncian deficiencias de seguridade viaria nas novas urbanizacións da Travesía de Arteixo

Demandan ao goberno local que atenda as reclamacións da veciñanza pola inseguridade nesta zona de forte crecemento de poboación

O grupo municipal socialista de Arteixo presentou no pleno as reclamacións da veciñanza da Travesía de Arteixo polas numerosas deficiencias na seguridade viaria da zona.

O portavoz socialista, Martín Seco, explica que no entorno da urbanización onde se atopa a ferretería Clickfer “hai unha serie de deficiencias na seguridade viaria que ben poderían ser atendidas polo goberno local” e sinala que “esta é unha zona de forte crecemento da poboación coa construción dun número importante de urbanizacións nos derradeiros anos e a chegada de moita rapazada ás vivendas”.

 Os socialistas enumeran algunas das solicitudes da veciñanza, como a finalización de toda a beirarrúa na marxe esquerda da travesía en dirección a Carballo, entre o centro de saúde e dita urbanización, para dar seguridade aos viandantes, así como a regulación do tráfico peonil e de vehículos na zona.

Ademáis solicitan o desprazamento da caseta de obra dunha promotora para deixar libre a beirarrúa que neste momento impide o paso dunha cadeira de rodas ou carriño de bebé, e que se remate o peche perimetral do furado que se atopa detrás da caseta que pode resultar perigoso para a rapazada.

Outra demanda é a eliminación das dúas prazas de aparcamento posteriores ao cruce coa rúa Hospital que dificultan a visibilidade de acceso ou saída á rúa, e a instalación dun paso de peóns no cruce co novo paseo fluvial e dunha varanda desde o paseo ata a ponte sobre o río.

“O goberno local debe manter a seguridade viaria no concello. Pedímoslle que faga o seu traballo e atenda as peticións da veciñanza” remata Martín Seco