O goberno local de Arteixo desatende as indicacións da Valedora do Pobo para intensificar os controis e a inspección das transmisións de ruídos ás vivendas

Os socialistas arteixáns insisten na necesidade dunha ordenanza de control de ruídos e acusan ao goberno local de autorizar un horario de apertura  dunha academia de baile ata as dúas de mañá.

O grupo municipal socialista reclamou de novo en pleno a dotación de equipos e formación necesaria á Policía Local para cumprir coas indicacións do informe da Valedora do Pobo Pobo en contestación á denuncia presentada por veciños da rúa Cidade de Bos Aires sobre os ruídos e molestias causados por un negocio no seu baixo. O informe da Valedora  instaba ao concello a intensificar os controis e a inspección das transmisións de ruídos ás vivendas.

Martín Seco, portavoz do grupo municipal socialista explica que o grupo de goberno do PP comprometeuse coa Valedora do Pobo a “redactar unha ordenanza de control de ruídos, así como a ter ao persoal formado para tal fin e adquirir o material necesario realizar ese control” en resposta a un expediente existente aberto pola queixa presentada por uns veciños da rúa Cidade de Bos Aires por ruídos e molestias causados polaacademia de baile que se sitúa no seu baixo. 

O concello de Arteixo autorizou a esa academia de baile un horario de apertura ata as dúas da mañá, asimilando a súa actividade a unha actividade recreativa de ocio e entretemento. “Somos descoñecedores se outras academias de baile do noso concello teñen unha apertura desta índole” argumenta Martín Seco.

“Descoñecemos tamén se o goberno local ten previsto seguir desatendendo as indicacións da Valedora do Pobo e se ten previsto redactar unha ordenanza de control de ruídos” engade o portavoz socialista, pero ademais “é necesario que o alcalde explique os motivos para asimilar a actividade dunha academia de baile a unha actividade recreativa de ocio e entretemento para poder pechar ás dúas da mañá”. 

Seco denuncia para rematar que “este non é o primeiro caso nin será o derradeiro por molestias causadas por ruídos e dende o goberno local son incapaces de cumprir coa Valedora do Pobo para preservar o benestar da veciñanza do noso concello”