Martín Seco: “Con máis de 2.000 desempregados é hora de deixar de vender fume e poñer en marcha medidas reais que axuden á cidadanía” - Municipais #26M

Os socialistas de Arteixo lamentan que o PP de Alberto Núñez Feijóo e de Carlos Calvelo teñan que recorrer a anunciar protocolos que só reservan solo para “tapar a falta de política industrial”

“Con oito anos de maioría absoluta, o resultado do PP en política de emprego é de máis de 2.000 desempregados. É hora de deixar de vender fume e poñer en marcha medidas reais que axuden á cidadanía”, afirma Martín Seco, candidato á Alcaldía de Arteixo polo PSdeG-PSOE.

Para corrixir esta situación, os socialistas propoñen, entre outras medidas, a posta en marcha da Axencia Local de Promoción Económica, para planificar e coordinar todas as políticas de emprego. Neste eido inclúe a reformulación da bolsa de traballo municipal, porque “só hai que falar cos usuarios e usuarias deste servizo para darse conta de que non funciona”. Tamén inclúen axudas ao emprendemento e aos autónomos.

Os socialistas fan fincapé en que a Empresa de Servizos que poñerán en marcha se chegan a Alcaldía se nutrirá desa bolsa de emprego municipal, “sempre en igualdade de condicións”.

“O PP de Alberto Núñez Feijóo e de Carlos Calvelo teñen que recorrer a anuncios de protocolos que só reservan solo, sen ningún tipo de garantía, para tapar a falta de política industrial”. O PSdeG-PSOE aposta por falar coas emrpesas para que a chegada das novas industrias xeren emprego en Arteixo. Ademais, “é necesario adiantarse e exixir á Xunta a formación adecuada e regulada para cubrir os postos cualificados”, expón Seco. “Nin tiveron nin teñen ideas para xerar emprego”, conclúe.