O PSOE de Arteixo pide axilidade para a execución do Paseo Fluvial de Vilarrodís
Simón López considera que o proxecto debe ser prioritario para o goberno municipal e agarda que as obras “non pasen a formar parte da longa lista de promesas incumpridas do PP de Carlos Calvelo”.
Integrantes do Grupo Municipal Socialista nos terreos do futuro paseo fluvial de Vilarrodís
No pasado mes de novembro, o goberno municipal de Arteixo anunciou o inicio dos trámites para licitar as obras do Paseo Fluvial de Vilarrodís. O proxecto, que responde a unha demanda histórica da veciñanza, acumula varios anos de demora dende agosto de 2018, cando a Xunta autorizou a expropiación dos terreos, e o PSdeG-PSOE considera que a construción desta infraestrutura debe ser unha prioridade para o goberno municipal. O portavoz socialista na corporación municipal, Simón López, cre que “o Concello ten unha débeda histórica” con este núcleo e considera que “chegou o momento de solucionar a carencia de áreas de esparexemento nunha das zonas con maior densidade de poboación de Arteixo”.
En opinión de Simón López, a construción da nova senda pola beira do rego das Teixueiras e a súa conexión coa área recreativa de Seixedo “non beneficiará só á xente de Vilarrodís, senón á veciñanza de todo o concello”. Nunha visita á zona, acompañado varios representantes do Grupo Municipal Socialista, expresou a súa preocupación ante a “falta de dilixencia” do goberno e anunciou que van reforzar a presión sobre o goberno para que se axilicen os trámites. “Non queremos que este proxecto pase a engrosar a longa lista de promesas incumpridas de Carlos Calvelo durante 12 anos de maiorías absolutas do PP”, indicou López.
Obras pendentes
O PSdeG-PSOE reclama “un maior compromiso con Vilarrodís” e o portavoz socialista considera que, xunto á construción do paseo fluvial, será preciso afrontar outras obras pendentes dende hai anos. Neste sentido, lembrou que “a veciñanza segue agardando pola mellora dos accesos á escola infantil e a construción do novo centro cívico”, pero reclama un proxecto “máis ambicioso” para o conxunto do núcleo urbano, onde se contemple a humanización da Avenida Manuel Platas Varela e a mellora integral da seguridade viaria.