Os orzamentos propostos polo Goberno do PP para Arteixo son “un copia-pega dos presupostos anteriores, non teñen en conta as novas circunstancias da covid e non son uns orzamentos sociais”. Estes son os motivos que nos levaron a absternos no pleno sobre as contas de 2021.

O voceiro socialista, Simón López, destacou os 50,7 millóns de euros deste presuposto e criticou que “esta cifra non se traduza nun pobo moito máis coidado e máis social”, e considerou que isto se debe a “deixadez, desidia e falta de iniciativas políticas por parte do Goberno municipal”.

Reprobamos que a día de hoxe Arteixo continúe sen PXOM. “É unha vergoña que un concello con 50,7 millóns de euros de orzamento non teña un plan xeral. Debería caerlles a cara de vergoña de levar gobernando dous mandatos e medio e segue sen saberse nada do plan xeral”, lamentou López.

Propuxemos, entre outras iniciativas, a dotación dun polideportivo para Vilarrodís, cubrir os parques infantís, dotar de contidos os centros sociais e a posta en marcha doutros novos. “Precisamos vivenda social e un cemiterio municipal e, sobre todo, máis gasto social”, indicou López.

A continuación, celebrouse un pleno extraordinario para aprobar un recoñecemento extraxudicial de facturas sen pagar. Neste caso, votamos en contra polas advertencias da interventora que no seu informe detalla que o concelleiro Víctor Merelas firmou os contratos correspondentes sen ter competencias sobre o tema.