Villoslada: “Feijoo recortou un 22% o gasto por habitante en educación e fomentou a desigualdade no acceso a un ensino de calidade”
Visitou Arteixo para verificar o abandono dos centros públicos, os problemas de masificación e as carencias de formación profesional no municipio
Juan Manuel Díaz Villoslada, denunciou hoxe en Arteixo que o goberno de
Feijoo, entre 2009 e 2015, “recortou nun 22% o gasto por habitante en
educación, algo semellante a quitarlle a cada galego 22 euros de cada 100
que pensaban destinar á formación dos seus fillos”.
E esta avultada redución de 400 millóns de euros “nun gasto público que en
realidade e un investimento de futuro”, precisou, ten consecuencias directas:
o despedimento de 2.500 profesores, a escaseza de persoal de apoio, a falta
de mantemento dos centros e as carencias materiais, entre outras.
Villoslada sinalou que para darlle a volta a esta “crecente desigualdade no
acceso da poboación con menos recursos a unha educación de calidade”, o
programa educativo que abandeira Xoaquín Fernández Leiceaga “proponse
recuperar o nivel de emprego e investimento en educación” anterior á chegada
de Feijoo, “a gratuidade dos libros de texto e o pacto en materia de
normalización lingüística no ensino”.
A visita de Villoslada a Arteixo serviu para deixar en evidencia a situación
educativa na que se encontra o concello logo de 8 anos de goberno do PP.
O voceiro municipal socialista, Martín Seco, denunciou o abandono que sofren os centros educativos locais. “Despois de anos de denuncias, nos últimos meses, e cun claro interese electoralista, o Concello asumiu algunha obra de reparación de cubertas que lle correspondería acometer á Xunta, pero sigue negándose a instarlle á Consellería a construción dun novo centro que alivie a crecente masificación escolar no municipio”.
Seco recordou que, precisamente, o último en construírse en Arteixo foi na etapa de Emilio Pérez Touriño, e que foi inaugurado en 2010 xa pola Xunta actual. “Nestes 8 anos non se fixo nada máis”, engadiu.
O candidato pola Coruña Antonio Álvarez, pola súa banda, puxo de manifesto os problemas do maior centro escolar de Galicia, o CEIP Ponte dos Brozos, que foi pioneiro no emprego das novas tecnoloxías nas aulas, pero que “agora, con algo máis de 1.100 alumnos, vese afectado tamén pola masificación”.
O aumento do número de alumnos fai precisa a contratación de profesorado de apoio en pedagoxía terapéutica e audición y linguaxe para atender a rapaces con necesidades especiais, “e falta tamén persoal coidador para alumnos discapacitados”, denunciou Álvarez. “O goberno do PP, seguindo os principios ideolóxicos da LOMCE, non está interesado na igualdade, e non lle interesa que determinado tipo de alumnos estea nas mesmas condicións cós demais na atención educativa”, afirmou.
O candidato e secretario de Organización de FESP-UXT referiuse tamén á situación da FP, que “non se acomoda ao tecido produtivo” dun municipio cunha intensa actividade industrial. A este respecto, Antonio Álvarez recordou que “son as propias empresas do polígono industrial de Sabón as que se ven obrigadas a impartir cursos de formación para atender as súas necesidades en recursos humanos”.
Álvarez e Villoslada fixeron fincapé na imprescindible colaboración e transferencia de coñecementos e tecnoloxía entre a Universidade e a empresa, un aspecto polo que pretende “apostar decididamente” o PSdeG.